Luk 1 | MMX | STEP | Saparap leeme silok, ne Tiopilas. Buaang nedi limixin diga lok tong i do dina malagan levelinga at lempanga ne Moroa ga lox i xantubu atnama at lukngen ne Iesu.

Luke 1

Lavapaase Axasep

1 Saparap leeme silok, ne Tiopilas.

Buaang nedi limixin diga lok tong i do dina malagan levelinga at lempanga ne Moroa ga lox i xantubu atnama at lukngen ne Iesu. 2 Diga malagan alii lugugu at ne Iesu, mo maga ronga i boro atnedi diga ven na lempanga at lavakpaxaru kaxat teren, la diga tong asu na Lagale Lavavang. 3 La nenia bok agara sue avukat ka vam levelinga mumu lorooro axap at ne Iesu; kuren la a doma i do i lox avukat kusu ana malagan akmokso lempanga ne Iesu ga lox i. 4 Ak lox i na kusu unabaklen avukat mo levelinga uga ronga vam i mumu ne Iesu.

Laangelo Ga Vaase Asu Lovotpot At Ne Jon Laradi Sep Susu

5 Ap mo levenaleng loorong silok ne Erodes gam gomgo [nga] to at lenep silok Judaia. Lara lamaasa, laasen teren ne Sakaria, neni lara atnedi lavamaasa diga nemen keneng at lara loxonbinam tadi, laasen ap mo loxonbinam tadi ne Abaisa. Latkin teren, laasen teren ne Elisabet; neni eburu mi ne Sakaria boro at livisik li at lamaasa me gano ne Aron. 6 Nedu buru duga nemen mokmokso at lemeren ne Moroa, la duga mumu asu amisik levelinga at ne Moroa, la leventaangas bok teren. 7 Ketla du goxo ruuna taxamdak, mila ne Elisabet goxo pisik, la nedu lenasun dugak sokso nga.

8 At lara laaleng libinam tadi at ne Sakaria digak lok to at loogu laplavang kusu dina lok lugugu atdi at lemeren ne Moroa; la ne Sakaria bok ga gugu. 9 La diga soxolik ka i xusu na xotos levempavaxan una i so mavak to xeneng at loxot kaala at loogu laplavang. Diga soxolik ka i mi lara loklok at leme Judaia; lavamaasa diga lu buru mi levenuat, la luat at ne Sakaria ga subu avot at laxangka. 10 At loxonaleng ti xotos levempavaxan una i so mavak, neni ga beles uto xeneng at loxot kaala at loogu laplavang at ne Moroa ti lok mo lavanga to at loxonin laplavang. Limixin diga nemen to maxamang, diga ngising.

11 La lara laangelo at ne Moroa ga rupot saparav i, ga tu to at lenep tino ap mo loxonin aplavang, ni [Sakaria] ga xotos levempavaxan una mavak e. 12 Sakaria ga ven i la ni ga lingun la ga umsu mi lanmarat. 13 Ketla laangelo ga lok tin, “Sakaria, nemen uta marat, Moroa ira ronga vam levesingising taram, la latkin taram ne Elisabet naba visik tamdak tu. Uba so asen i mi ne Jon. 14 Nenu uba momo la una sosoro aleng, la buaang bok nedi diba momo aleng mo do latkin taram na visik tamdak, 15 mila neni naba silok tinotno at lemeren ne Moroa. Nemen mo lamdak guta inin taxadan vaen la taxadan lolos. Ap mo laaleng nenen na visix i, neni naba umsu mi Loroonan Kaala. 16 Neni naba sat ka amlong buaang nedi limixin me Israel saparap ne Moroa, Leeme Silok atdi. 17 Neni nabamgo ri Leeme Silok, mi Loroonan Kaala la lololos, i ngan leeme vapaase alii ne Elaisa; neni naba vaxaxis etangas avukat luvuttemen eburu mi laxamdak atdi kusu luvuttemen dinaba balamu laxamdak atdi; neni naba ba gili levendoxoma at limixin tongtonga xepe kusu dina rebeng kaka lodoxoma mokmokso; neni naba lox agagas limixin at ne Moroa kusu dinaba gagas tangais Leeme Silok.”

18 Sakaria ga lok ti laangelo, “Abaklen i xereva do levelinga ram i ruturun? Mila nia laradi asioxo la latkin bok tarak neni iak sokso vam.”

19 Laangelo ga lok tin, “Nenia ne Gabriel. A tu amisik to saparap ne Moroa, mo i sak tiki ia xusu ana vaase tu, la ana tong asu i na levelinga nunuan tu. 20 Ketla uxo nuunu at levelinga rak, mo naba sorun at loxonaleng ne Moroa ga vaase alii vam i ren. Kuren la na u noxo epovo una paase, se ap mo laaleng na lavapaase alii rak naba sorun.”

21 Ap mo mene loxonaleng mo limixin diga ngangais ti ne Sakaria, digam doma mumu do lai mo ni ga lox angtang min to xeneng at loxot kaala at loogu laplavang. 22 Se neni ga vas su ukamang, ni goxo epovo na vaase rinedi; kuren la digaklen i do, ni mo ga ven pam lisilimet to xeneng at loxot kaala. Ni ga lok mun leveloklok poovo rinedi mi lukngen; move ni goxo epovo kusu na vaase.

23 Se neni ga lox axap mo lugugu teren to at loogu laplavang, neni gamlong uto xolonu. 24 Melemu latkin teren ne Elisabet ga renan, la ni ga nemen tino go at loogu ren at lavalimo gaaling. 25 Ni ga lok, “At naba la ne Moroa ira balamu ba ia at na langas. Nia aga lok mamangan mila a goxo pisik, ketla a renan ta la lainmangan tarak ira xap pam.”

Laangelo Ga Vaase Asu Livipisik At Ne Iesu

26 At lagaaling sepsev avanna at lereterenan at ne Elisabet, Moroa ga sak tiki laangelo ren, ne Gabriel uto Nasaret, lara lemenemen to at lenep silok Galili. 27 Ni gat pas mi levelinga ti lara loono maxat laasen teren ne Maria, mo diga lok katling i xusu naba epot at lara laradi laasen teren ne Josep, at livisik li at ne Devit, loorong silok me gano. 28 Laangelo ga rupot saparap ne Maria la ga lok tin, “Lenmila na nemen eburu minu! Moroa i nemen eburu minu, la i vara aleng u la ni naba lox anarong u.”

29 Maria ga lingun at levelinga at laangelo, la gam doma mumu lavasuun ap mo levelinga. 30 Ketla laangelo ga lok tin, “Maria, nemen uta marat, mila ne Moroa ira lok momo vam minu. 31 Unaba renan la unaba visik tamdak, la uba so asen i mi ne Iesu. 32 Neni naba silok aleng la neni naba ruuna na laasen do lamdak at ne Moroa i silok aleng. Moroa naba lox i ngan loorong silok, i ngan [lara] ren ne Devit, neni loorong silok me gano; 33 la neni naba nemen amisik ngan loorong silok at livisik li at ne Jakop; lixitkis orong teren noxo xap!”

34 Maria ga lok ti laangelo, “Nenia kopmen ana epot! Naba lok kereva na?”

35 Laangelo ga lok tin, “Loroonan Kaala naba vot saparav u, la lololos at ne Moroa naba los kis taram; kuren la nom lamdak dadat diba so asen i do lamdak at ne Moroa. 36 Una doxoma lara ram ne Elisabet. Diga tong i do ni noxo visik; ketla neni xa i vanna nga leven gaaling teren, keke i do neni ira sioxo vam. 37 Kopmen tempanga na lolos saparap ne Moroa kusu ni na lox i.”

38 Maria ga lok, “Nia mun lasaxaruki at ne Moroa, i epovo do na lavanga na rupot saparav ia i ngan ura tong pam i.” La laangelo ga on basinge i.

Maria Ga Vot Pasa Ne Elisabet

39 Melemu at lentaba levenaleng Maria ga lox agagas, la ni gat pas soso uto at lempatkaana at lara lemenemen gak lok to at lenep kangka Juda. 40 Ni ga vubeles uto xeneng at loogu at ne Sakaria la ga vaase momo ri ne Elisabet. 41 Ga se ne Elisabet ga ronga mo levelinga at ne Maria, lamdak ga xuluxut to xeneng at lebelen. La ne Elisabet ga umsu mi Loroonan Kaala, 42 la ni ga vaase silok keretna, “Nenu loono u umsu mi loklox anarong tinedi lavakin axap, la nom lamdak nenu uba visix i, Moroa naba lox anarong i! 43 Tila ba la nenen Leeme Silok ira vot pasa ia, nenia latkin gamasa mene? 44 Ap mo loxonaleng u paase ria, la lamdak na xeneng at labalak i xuluxut mi lososoro. 45 Moroa naba lox anarong u mila uga nuunu do levelinga at ne Moroa naba sorun!”

Livikpixan Emi Asu At Ne Maria

46 Maria ga lok,

“Nenia a emi asu mi ne Moroa; 47 lorooro axap tarak i umsu mi lomomo mila ne Moroa neni Laradi Loklox Arooro rak, 48 la neni ira doxoma su vam tarak, latkin gamasa mun. La nenia lasaxaruki ren. Limixin axap diba rupot melemu diba tong i do Moroa ga lox anarong ia, 49 mila ne Moroa Lolos ira lok pam na lavanga silok tia. Laasen teren i melemelengan. 50 I lox asuusu labalamu ren tinedi di lok ngangao ren at laraola axap. 51 Neni ik lok lempanga lolos, la i utut tereve levendoxoma at limixin di lox asilok nedi. 52 Ni ik lox asi lavaorong silok basinge lixitkis orong atdi, la ik lox asilok limixin etaba. 53 I suxa umsu limixin dik pakes mi lempanga nunuan, la ik tiki limixin dip novos la dit pas la kopmen bok ba tempanga dina ruuna i. 54 Ni ga doxoma lavapaase alii ren ga lox i rinedi lavalabat atnama, la ira lok tooro lubungmixin teren me Israel, nedi lavasaxaruki ren. 55 La i lox asuusu amisik labalamu ren kerekngan ni ga lok lavapaase alii ren ti lavalabat atdik la ti ne Abaram, la ti livisik li bok teren.”
56 Maria ga nemen eburu mi ne Elisabet at lavantun gaaling axap la melemu neni gamlong bok ba uto xolonu ren.

Elisabet Ga Visik Ne Jon Laradi Sep Susu

57 Laaleng ga vot nga kusu ri ne Elisabet na ranga madak, la ni ga visik lamdak temes. 58 Lentaba no diga nemen saparav i la libibinat teren diga ronga i do ne Moroa ga lok loklox avukat aleng tin; kuren la diga lok momo aleng eburu mi ne Elisabet.

59 Ga at laaleng sepsev avanuan digat pas kusu dina ven ne Sakaria na vit kepe loxontuxu at lamdak teren; diga lok do diba so asen i mi ne Sakaria, laasen at ne temen. 60 Ketla nenen ga lok, “Kopmen! Laasen tin ne Jon.”

61 La diga lok tin, “Ketla kopmen tara at libibinat taram i ruuna nom laasen!”

62 Kuren la diga lok loklok poovo ti ne Sakaria, kusu dina sue i do ua laasen mo lamdak naba ruuna i. 63 Sakaria ga sing ti tovoang mamalagan la ni ga malagan keretna, “Laasen teren ne Jon.” La nedi axap diga sangu.

64 Ap mo mene loxonaleng Sakaria ga lox epovo manga i kusu na paase, la ni ga emi asu mi ne Moroa. 65 La mo limixin diga nemen saparav i diga sangu aleng, la lavapaase mumu i na lavanga ga epeseves keneng at lengkot axap at lempatkaana at lenep silok Judaia. 66 Nedi axap getgesara diga ronga i na, la digam doma mumu i la diga esue xeretna, “Ana lamdak naba lok kereva?” Diga paase xerepmo mila digaklen i do lololos at ne Moroa ga nemen eburu min.

Lavapaase Alii At Ne Sakaria

67 Temen ne Jon ga umsu mi Loroonan Kaala, la ni ga vaase mi levelinga at ne Moroa,

68 “Ata emi asu mi ne Moroa, Leeme Silok me Israel! Ga vot ti soxomus asu limixin me Israel at loxokoxo at ne Satan. 69 Ni ga gagas li laradi lolos i ngan Laradi Loklox Arooro ridik, neni livisik li at ne Devit, laradi gugu ren. 70 Gano migomgo at lavaeme vapaase alii ren, neni ga tong i na. 71 Ga paase alii xusu na lox arooro dik basinge nedi dik lok munepen midik la basinge di, di belemamao dik. 72 Ni ga lox empana lavapaase alii ren ni ga lox i ri lavalabat atdik la kerepmo i lox asuusu labalamu ren tidi. 73 Ni ga lok lavapaase alii ruturun ti ne Abaram, leeme silok at lavalabat atdik, 74 la ga paase alii do ni naba lox arooro dik basinge limixin dik lok munepen midik, la na lok tooro dik kusu ataba epovo, la tanap kip mo lugugu ren la kopmen dik taxo marat. 75 At levenaleng axap at lorooro atdik, atap kip lugugu ren mi loklok i xaala la ik mokso. 76 La nenu lamdak tarak, uba ruuna na laasen, laradi vapaase alii at ne Moroa Silok Aleng Tinotno; mila ubam gomgo ri Leeme Silok kusu unaba gagas li langas tin, 77 la uba tong i ri limixin teren do neni ba lox arooro di la neni naba doxoma xepe laxakapmek atdi. 78 Neni ba lox i na mila ne Moroa atdik i umsu mi labalamu silok; kuren la ni naba riki asi Lanarong teren kusu na ravasu ude ri na lavatbung menemen ti lox arooro limixin. 79 La ni naba lok ngan laxasep tinedi limixin di nemen keneng at lamain la tinedi bok dik lok maxopok at lamau at lanmet, la neni naba sat lavatpas atdik ti langas at lumulum.”
80 Jon ga silok la loklok teren ga nunuan aleng. Ni ga nemen to at lamatbin se at laaleng neni ga vot asuvos tinedi limixin me Israel.